Croeso i gofnod diweddaraf ein Dyddiadur Gweithio ar y Cyd! Mae’r haf wedi dechrau yn swyddogol ac mae’r heulwen wir wedi codi calonnau 🌞

Rydym wedi cael sawl wythnos cyffrous, gan gynnwys cyfarfod o Fwrdd Llywio a Chynghori 2 (BLlCh2), cyfarfod Bwrdd Partneriaeth Rhanbarthol (BPRh) a sesiwn gyntaf ein Fforwm Rheolwyr Gwirfoddoli. Dyma drosolwg o sut aeth y cyfan…

---

Bwrdd Llywio a Chynghori 2 (BLlCh2)

Mae BLlC2 yn cwmpasu tair rhaglen ranbarthol – ‘Lles ac Anabledd Dysgu’, ‘Dementia’ a ‘Lles Emosiynol ac Iechyd Meddwl’.

Mae rhifyn diweddaraf ein Cylchlythyr, a gyhoeddwyd yn ystod Wythnos Anabledd Dysgu 2024 (17-23 Mehefin), yn rhoi cipolwg manwl ar gynnydd y rhaglen ‘Lles ac Anabledd Dysgu’. Nodwyd thema ‘Cludiant’ fel y flaenoriaeth gyntaf i’w symud ymlaen fel rhan o weithrediad y Strategaeth Anabledd Dysgu, ac ar 9 Gorffennaf bydd pobl ag Anabledd Dysgu yn dod ynghyd â darparwyr gwasanaethau trafnidiaeth gyhoeddus i drafod yr heriau y maent yn eu hwynebu. Gallwch ddod o hyd i ragor o wybodaeth a chadw lle ar y gweithdy hwn drwy fynd i Ticketsource.

Mae gwaith ar ail flaenoriaeth y Strategaeth, ‘Cael y Gofal a’r Cymorth Cywir’ hefyd yn dod yn ei flaen yn dda. Mae pobl wedi dweud wrthym eu bod eisiau cymorth mwy hyblyg a mwy o lais yn y gofal a gânt gan y gwasanaethau Iechyd a Gofal Cymdeithasol, felly dyna fydd ffocws y rhaglen waith hon dros y 12 mis nesaf.

Y newyddion diweddaraf o ran y rhaglen ‘Dementia’ yw bod hyfforddiant bellach ar gael i unigolion, sefydliadau cymunedol a busnesau. Mae’r ‘Dementia Plus Awareness Training’ yn cael ei ddarparu gan Dementia Friendly Swansea, sydd hefyd yn rhedeg yr Hwbs Dementia ar draws ein rhanbarth (a ariennir drwy’r Gronfa Integreiddio Ranbarthol, a weinyddir gennym ni yng Ngorllewin Morgannwg). 

Rydym hefyd wedi gweld datblygiadau ar draws gwasanaethau meddygon teulu gan fod yr holl ymarferwyr bellach yn defnyddio ‘Codau Read’ i gategoreiddio gwahanol fathau o Ddementia. Dros amser, bydd hyn yn darparu data mwy cadarn a chyson a fydd yn helpu i wella gwasanaethau.

O ran ‘Lles Emosiynol ac Iechyd Meddwl’, roedd rhifyn 5 o’n Dyddiadur yn cynnwys diweddariad ar ymweliad diweddar gan Lywodraeth Cymru i’r ‘Congolese Development Project’. Chwaraewyd y stori ddigidol a recordiwyd ar y diwrnod yn BLlCh2 ac mae ar gael i’w gweld yma:

Derbyniodd aelodau’r Bwrdd ddiweddariad hefyd ar ddatblygiadau’r meysydd blaenoriaeth sef ‘Datblygu Model Comisiynu Newydd ar gyfer Sefydliadau Trydydd Sector a Sefydliadau Dielw’ a ‘Gwella Mynediad i Wasanaethau (sy’n canolbwyntio ar Gyfathrebu ac Ymgysylltu a Phwynt Mynediad Sengl/No Wrong Door)’.

---

Fforwm Rheolwyr Gwirfoddoli

Ar Ddydd Mercher 19 Mehefin, lansiwyd Fforwm Rheolwyr Gwirfoddolwyr Rhanbarthol newydd yng Nghanolfan Llys Nini ym Mhenllergaer, Abertawe. Daeth cyfranogwyr o amrywiaeth o sefydliadau sy’n cynnwys gwirfoddolwyr ar draws ein rhanbarth, a rhoddodd pob unigolyn drosolwg o sut beth yw gwirfoddoli yn eu sefydliad. Dilynodd cyfres o drafodaethau a helpodd sefydlu cyfeiriad cyffredinol y Fforwm, ac mae’r adborth hyd yn hyn wedi bod yn wych! Bydd y Fforwm yn cyfarfod ddwywaith y flwyddyn – byddwn yn dod â mwy i chi ar sut mae’r Fforwm yn datblygu mewn rhifyn arall o’r Dyddiadur.

---

Bwrdd Partneriaeth Rhanbarthol (BPRh)

Cyfarfu’r Bwrdd Partneriaeth Rhanbarthol Gorllewin Morgannwg ar ddydd Mawrth 25 Mehefin, a’r prif ffocws oedd cynnydd y Rhaglen Partneriaeth Gofalwyr. Cyflwynodd Gaynor Richards (Cadeirydd y Bwrdd Partneriaeth Gofalwyr) ddiweddariad fideo ar y Strategaeth Gofalwyr Rhanbarthol. Roedd yr aelodau wedi’u plesio’n fawr gan yr hyn sydd wedi’i gyflawni hyd yma a chanmolwyd pawb a gymerodd ran, yn enwedig y Gofalwyr Di-dâl eu hunain sy’n gwirfoddoli eu hamser, eu sgiliau a’u profiadau gwerthfawr i sicrhau bod y Strategaeth yn parhau i ddarparu canlyniadau ystyrlon i Ofalwyr.
Cafodd ein Hadroddiad Blynyddol ar gyfer 2023-24 ei gymeradwyo gan y Bwrdd hefyd ac mae ar gael i’w weld yma.

Diolch am ddarllen – fe welwn ni chi ar ôl y BLlCh nesaf 😊